نبذة مختصرة عن قسم اللغة العربية كلية التربية في الجامعات العراقية

 قسم اللغة العربية كلية التربية 

قسم اللغة العربية قسم حلو واكو طلاب دخلوا هذا القسم مو بإرادتهم وماحابين القسم ابد .. بس اكثرهم  تغيرت نظرتهم بمرور الأيام 

العربي مو بس نحو ولا بس حفظ وإنما بيه الفهم وبيه الحفظ وكل مادة من المواد الأساسية مرتبطة ببعضها ولازم بالأول نفهم المواد كفهم وتكون غايتنة مو فقط النجاح بالمواد وإنما تطوير قدراتنا بهذا المجال 

 راح احجي شوية عن مواد هذا القسم :-

مواد قسم اللغة العربية 

بالمرحلة الأولى 11 مادة 

1. النحو/ وهو مادة أساسية يبقى الأربع مراحل كلهم  هاي المادة تحتاج تركيز ولازم يكون عندك اساس بالقواعد  هواي طلاب عدهم خوف من هاي المادة بس بالأخير  ينجحون

2. الصرف / يختص بالكلمات وجذورها واشتقاقتها وغيرها من المواضيع 

3. التعبير / هاي المادة تهتم بتوضيح الأخطاء الإملائية وكيفية الكتابة بدون اخطاء

4. ادب جاهلي / تختص هاي المادة بدراسة الأدب في فترة قبل الاسلام  وشلون تعلموا الكتابة وغيرها هاي المادة بيها صعوبة لأن اكثر الكلمات بالعصر الجاهلي اندثرت هسه وما مألوفة النا

5. علوم القرآن / يشبه مادة الاسلامية يوضح علاقة القرآن الكريم باللغة العربية وسبب نزوله بهاي اللغة وغيرها 

6. انگليزي / مادة كلش بسيطة ندرس بيها أساسيات اللغة الانگليزية و فقط بالمرحلة الأولى

7. بلاغة/ تختص بدراسة علم المعاني والبيان ..

8.  حقوق / مادة درخية ندرس بيها حقوق الإنسان وهاي المادة يدرسوها طلاب المرحلة الاولى بأغلب الكليات

9. اسس تربية / ندرس بيها نظريات و آراء العلماء لطرق التدريس الصحيحة

10. حاسبات / مادة تختص بتعليم برامجيات  الحاسوب وكيفية استعماله

11 علم النفس تربوي /مادة كلش حلوة وبسيطة تعلمنة شلون نتعامل مع الطلاب ومراعاة الفروقات بينهم

هاي فقط مرحلة اولى بعدين بالمراحل المتقدمة راح يقلن المواد .

 اكثر الاحيان صعوبة المواد تعتمد على التدريسي ..

وحتى لو كانت المادة صعبة التدريسي  يگدر يخليها من اسهل المواد أو بالعكس مرات مادة كلش سهلة بس الاستاذ يصعبها على الطلاب

القسم يقبل الفرع الحيائي والتطبيقي والأدبي  ويكون المعدل للقبول في هذا القسم

 حسب الحدود الدنيا.