اعادة السنة لطالب السادس الاعدادي الفكرة الاصعب ومخاوف من اتخاذ مثل هكذا قرار
السؤال الشائع : معدلي بالتسعين، بالثمانين، بالسبعين… شنو نصيحتكم إلي اعيد لو لا، داحس ما راضي عن معدلي؟ اذا عدت اطلع معدل لو لا؟ شنو اليضمن الضروف سنة الجاية؟ شسوي؟…
عزيزي/عزيزتي.. اني ما اكدر أقرر الك إذا تعيد أو لا، و لا اعرف شراح يصير بالمستقبل، بس ربنا يعلم الغيب..
يعني قرار الإعادة هذا قرار تتحمل مسؤوليته وحدك انت، انت الي تقرر بشي يخص مستقبلك مو تخلي غيرك يقررلك..
و هسه راح اوضحلكم بعض النقاط إلى تساعدكم بأتخاذ قرار الإعادة:
أولاً: قبل اتخاذ أي قرار، و منه قرار الإعادة لازم تكون نفسيتك مرتاحة، لإن اذا جنت متوتر و تريد تأخذ قرار فراح يكون هالقرار غلط؟ اوك؟
ثانياً: راح أسألك اسئلة و انت جاوب نفسك عليها و اذا جاوبت عليها راح تساعد نفسك بالشي الصح.
1.عندك حلم تريد تحققه و كلية تريد تدخلها و ما تكدر تشوف نفسك الا بيها؟
2. عندك استعداد تعوف الخوف المبالغ بيه و القلق إلي من غير سبب و تركز بدراستك؟
3.عندك استعداد تتخلص من أخطائك إلي خطأت بيها بهاي السنة؟
4.عندك استعداد تستغل وقتك احسن استغلال و تعوف كل الوسائل إلي تلهيك عن دراستك؟
5.عندك استعداد ما تباوع على غيرك، و ما تخلي اي انتقاد يأثر عليك و يقلل من عزيمتك؟
6.هل تعرف نفسك انو عندك طاقة تقدم أكثر و أكثر حتى تجيب معدل أعلى من اول سنة؟
جاوب على هذني الاسئلة و صدگني راح تكدر تقرر، بعد إكمال إجاباتك، تكعد مع نفسك فد ربع ساعة تناقش هالشي ببالك و تأخذ الجوانب الإيجابية و السلبية بيه تكمل و تلجأ للباري عز و جل تصلي ركعتين استخارة و ربنا راح يدليك عالطريق الصحيح.
الاسئلة الأكثر تداولاً
س:إذا عدت اكدر اطلع معدل؟هو اني بنص المادة و ما طلعت معدل…
ج:كمية المادة ما الها علاقة بالمعدل، اي طالب عنده هدف يريد يحققه، ما يهمه شنو هي الماده و شكد كميتها.
س:إذا اعيد اكيد اطلع معدل أعلى من السنة الاولى؟
ج:هالشي يعتمد عالطالب نفسه، اذا الطالب شد حيله و درس زين و استغل وقته بشكل مثالي راح يكدر يطلع معدل و معدل كولش زين همات و أعلى من السنة الأولى إله بالسادس، اما اذا الطالب تهاون لا و الله يجوز يطلع معدل أقل من معدله السابق.
راح انطيكم مثالين عن طلاب جربوا يعيدون السنة .
مثال اول/ اكو بنية حلمها الطب العام امتحنت اول سنة و ما طلعت معدل، و امتحنت ثاني سنة و طلعت معدل 94 و يقبلها طب موازي، بس همات عادت السنة و هالسنة طلعت 98.1 ما عدا الإضافات و هيج حققت حلمها فهي مثال إيجابي عن الإعادة.
مثال ثاني /احد اقاربنا عاد السادس ثلاث مرات، طامحاً لدخول كلية الطب لكن ما حقق هالهدف لإن تهاون و ما شد حيله و اتخذ الإعادة لعبة بس مضيعة وقت نگدر نعتبره مثال سلبي عن الإعادة.
تكدر تتخذ القرار إذا قريت الكلام الي حجيته و فكرت بيه زين.
أحد فقرات مجلة البصري التعليمية وتتحدث عن إعادة السنة، للكاتبة القديرة إمتياز
الإعــادة
أنت حتى تعيد لازم تلتزم بهذول النقاط
1. ما عليك بأي واحد يحچي وتبقى تهتم لنفسك.
2. تتحمل كل الكلام والضغوط الي عليك لربما اضعاف ضغوط السنة الاولى فكلها هاي تتحملها
3. تحاول قدر الإمكان معرفة اخطاءك بالسنة الاولى وتصححها.
4. ربما ماكو حذف للسنة الجاية والدوام حضوري فلا تستغرب.
5. ربما المعدلات تصعد السنة الجاية، فأتوقع كل شي.
6. وأهم شي تبنيلك طاقة ضعف طاقة السنة السابقة.
هاي النقاط الفوگ اذا أنت تگدر تسويهن فخلص الك القرار،
إياك ثم إياك تستشير أحد بالإعادة محد يعرف مصلحته غيرك وانا ثبتتلك النقاط الاساسية، بس عليك تتحمل كل عواقب السنة التجي وإذا انت كفو تگدر تحصل على الي تريده،
اكو طلاب عادت وحصلت على الي تريده واكو عادوا وكانت إعادتهم سلبية فاللي يگلك الإعادة ما تگدر تسوي شي غلس عنه وأشتغل لنفسك.
عليك أن تتحمل كل الضغوط الي تجيك وكلش عادي ربما حتى أقرب شخص الك يظل ينتقدك لكن أنت أشتغل لنفسك وشوفهم النهاية كيف تكون.
لا تجي تگول انا كذا وكذا تنصحني أعيد؟ أرجع واگلك لا انا ولا أي واحد يگدر ياخذ القرار عنك.
