نبذة مختصرة عن كلية العلوم قسم علوم الجو في الجامعات والكليات العراقية

نبذة مختصرة عن كلية العلوم قسم علوم الجو  

– هالقسم كلش حلو ومتخصص بعلوم الفضاء والجو وطبقات الارض والفلك وغيرها ،  والجو والطقس كذلك

– اعلى معدل تقبله 82.7 واقل معدل 82.4 للاحيائي ، قبل چان معدل 70 ، تعيينه غير مركزي ، ومده الدراسه هي اربع سنوات والشهاده بكالوريوس  ، وتگدر طبعاً تكمل دراسات عليا مثل ماستر ودكتوراه  ،  او تگدر ورا متكمل البكالوريوس تقدم ع معهد الطيران وتتعين بالقوه الجويه ،  ماكو اهلي ، اكو موازي ويقبل اقل من المعدل المطلوب بدرجتين ، ويگدر يكمل دراسات عليا اكيد اذا جان المعدل يأهل للماستر يعني من 65 وفوگ يصير يقدم ع الماجستير ووراها حتصير مفاضله بين المعدلات

اما التعيين يكون بهيئه الانواء الجويه والمطارات ومطلوب بأغلب الوزارات كـ راصد جوي 

– اذا تريد تطور نفسك بالعطله قبل الدوام ، اهم شي انو تتعلم كيف تستخدم الحاسوب ، وتطور اللغه الانگليزيه ، المواد اغلبها ح تكون انگليزي لذلك لازم واحد يطور نفسه بالانكلش بس راح تكون سهله بالترجمه وشرح الاساتذه راح تسهل بعد اكثر 

– تتوزع الوحدات ع كل مرحله  ، بالاولى ( 10 درجات ) بالثانيه ( 20 درجه ) بالثالثه ( 30 درجه ) بالرابعه ( 40 درجه ) ، هجي حينجمع معدل 4 سنوات من 100 وهذا الي حيعتمدو بالماجستير ، المواد النظريه ح تكون 30 سعي و 70 للفاينل حيصير المجموع 100، والمواد الي بيها عملي ونظري حينقسم السعب الي هو 40 درجه بين النظري 28 والعملي 12 والفاينل من 60 وايضاً حينقسم 20 عملي و 40 نظري وهماتين يكون المجموع ويتكرر هذا التوزيع بالكورسين 

– برأيي هو قسم راقي ودراسته مو صعبه وتگدرون تكملون دراسات عليا ومميز جداً موجود فقط بالجامعه المستنصريه يعني مموجود بأي جامعه عراقيه ثانيه ، وبالوطن العربي بس اربع دول تدرس هالاختصاص ومن ضمنها العراق ، طلابه قليلين بس الاغلبيه يگولون تعيينه صعب بس الحقيقه انو حتا بقيه الاقسام تعيينها صعب